29 përfaqësues të forumeve rinore të 14 partive politike nga i gjithë vendi morën pjesë në eko-hakatonin shumëpartiak rural, të organizuar në kuadër të Programit zviceran për mbështetje zgjedhore, nga Fondacioni ndërkombëtar për sisteme zgjedhore (IFES) dhe Instituti për strategji ekonomike dhe marrëdhënie ndërkombëtare – Ohër. Ngjarja përfundoi me nënshkrimin e Deklaratës së parë të përbashkët për zhvillimin rural, një dokument që bashkon vizionin e liderëve të rinj politikë për komunitete rurale më të qëndrueshme dhe të begata.
Deklarata është rezultat i një procesi intensiv tre-ditor të bashkë-krijimit, në të cilin pjesëmarrësit e rinj, përmes punës në ekip dhe mbështetjes nga ekspertët, përgatitën rekomandime specifike për:
- Rreziqet mjedisore lokale – menaxhimi i mbeturinave dhe deponive të egra;
- Mbrojtjen e burimeve natyrore dhe ekosistemeve lokale;
- Ndryshimet klimatike dhe ndikimin e tyre në bujqësi dhe jetën rurale; dhe
- Ekoturizmin e të rinjve dhe mundësitë për zhvillimin sipërmarrës rural.
Me nënshkrimin e Deklaratës, forumet rinore të partive politike demonstruan pjekurinë dhe përgjegjësinë e tyre, duke dërguar një mesazh të qartë se sfidat kryesore në komunitetet rurale janë më të rëndësishme sesa dallimet partiake. Vizioni i tyre i përbashkët është që e ardhmja e zonave rurale të bazohet në zhvillim të qëndrueshëm, bashkëpunim të ndërsjellë dhe zgjidhje konkrete për qytetarët.
Ky dokument përfaqëson një pikë fillestare, fillimin e një procesi në të cilin idetë dhe rekomandimet e të rinjve do të zhvillohen më tej dhe do të përfshihen në programet dhe politikat e ardhshme zgjedhore për zhvillimin rural. Me këtë deklaratë, të rinjtë kanë treguar se janë të gatshëm jo vetëm për të diskutuar, por edhe për të vepruar, për të hedhur themelet për politika që do të jenë në shërbim të komuniteteve dhe do të sigurojnë një jetë më të mirë për brezat e tanishëm dhe të ardhshëm.
