Tryeza e sotme e rrumbullakët kushtuar avancimit të reformave zgjedhore në Maqedoninë e Veriut bashkoi institucionet kryesore, trupat mbikëqyrës, partitë politike dhe shoqërinë civile, me qëllim që agjenda reformuese të lëvizë nga rekomandimet drejt zgjidhjeve konkrete dhe të zbatueshme.
Pjesëmarrësit zhvilluan një diskutim gjithëpërfshirës dhe konstruktiv, duke u fokusuar në prioritetet, përgjegjësitë dhe mundësitë reale për zbatimin e reformave në fushën e zgjedhjeve. Me këtë rast, u theksua nevoja për veprim të koordinuar institucional dhe përkushtim të vazhdueshëm politik në zbatimin e rekomandimeve të ODIHR-së. Tryeza e rrumbullakët përfaqëson një hap të rëndësishëm në ruajtjen e impulsit reformues dhe në forcimin e bashkëpunimit për një sistem zgjedhor më transparent, më llogaridhënës dhe më gjithëpërfshirës, në përputhje me detyrimet ndaj OSBE-së dhe standardet ndërkombëtare.
Aktiviteti u organizua në kuadër të projektit “Institucione rezistente për qeverisje demokratike dhe zgjedhje në Ballkan”, financuar nga Qeveria e Mbretërisë së Bashkuar me mbështetjen e Ambasadës Britanike në Shkup, Programit Zviceran për Mbështetjen e Zgjedhjeve, i implementuar nga IFES, si dhe projektit të ODIHR-së “Mbështetje për reformat zgjedhore në Ballkanin Perëndimor”, financuar nga Bashkimi Evropian.
