Fundjavën e kaluar në Strumicë, Qendra për hulumtime dhe analiza e VMRO-DPMNE-së dhe IFES-i organizuan së bashku një punëtori për anëtarët e forumit rinor të partisë, me titull “Nga ideja te politika publike: Zhvillimi i brezit të ri të liderëve politikë”.
Gjatë punëtorisë interaktive treditore, politikanët e rinj patën mundësinë të mësojnë dhe të shkëmbejnë përvoja lidhur me funksionimin organizativ të partisë politike, hartimin e politikave publike të bazuara në dëshmi, paraqitjen publike dhe komunikimin politik, si dhe zhvillimin e aftësive udhëheqëse.
Programi përbëhej nga një kombinim sesionesh interaktive, ushtrime praktike dhe biseda me politikanë më me përvojë, me qëllim që pjesëmarrësve t’u mundësohej të lidhnin njohuritë e fituara me sfidat reale dhe të kontribuohej në ndërtimin e proceseve politike më të informuara, më të përgjegjshme dhe të orientuara drejt qytetarëve.
Ky aktivitet është pjesë e veprimtarive të vazhdueshme të Programit Zviceran për Mbështetjen e Zgjedhjeve, që synojnë forcimin e kapaciteteve të partive politike për hartimin e politikave të bazuara në dëshmi.
