СЕ ОДРЖА ПРВАТА РАБОТИЛНИЦА ЗА МОБИЛИЗАТОРИТЕ НА ЗАЕДНИЦАТА

Првата работилница за мобилизаторите на заедницата се одржа од 14 до 16 февруари во Крушево. На оваа работилница,  16 млади лица од сите 8 развојни региони во земјата учеа за стратегиите и најдобрите практики за мобилизирање на заедницата и за следење на изборните ветувања на политичките партии.

Освен тоа, мобилизаторите на заедницата заеднички го дефинираа поимот „јавна политика“, а дискутираа и за мапирање на актерите, како што се Уставниот суд, граѓанските организации, локалната и централната власт. Учесниците исто така разговараа за процесот преку кој грижите и проблемите на граѓаните може да се преточат во јавен интерес и да го привлечат вниманието на актерите кои се вклучени во формирање на јавните политики. Мобилизаторите на заедницата исто така ги анализираа програмите на неколку политички партии, како и програмата на Владата за 2017-2020 година. Анализата се фокусираше на следниве елементи: процесот на осмислување на програмата, реалистични наспроти нереалистични цели/ветувања, како и вклученоста на потребите на сите сегменти на општеството.

Во наредните месеци, двигателите на заедницата:

• ќе поминат низа обуки и работилници за зајакнување на своите капацитети;
• ќе следат во колкава мера се исполнуваат ветувањата на политичките партии;
• ќе снимаат кратки видеа од процесот на следење; и
• ќе спроведат иновативни иницијативи чијашто главна цел ќе биде мобилизирање на заедницата за активно да се вклучи во политичкиот живот и одблизу да ја следи работата на избраните функционери.

Доколку сакате да дознаете повеќе за програмата и улогата на двигателите на заедницата, кликнете овде.